ما يدوم حال السلام عليكم و رحمة الله و بركاته
كان غادي فالطريق عينيه محلولين و لكن لعقل ما كاينش كيف كيقولو عندنا "مَسْتُوهْ" ، الدنيا ظلْمَتو و الْهَمْ قتلو أو غادي كيجري أو ما قْدَرْش يَوْقَفْ ، وَخّا عْطَرْ فحَجْرَا أو طار ظفرو أو سال دمو ، أو هو ما فهاد العالم .
شْوِيَا كيسمع صوت واحد لمْرَا كبيرة فالسِّنْ كَيْدُوزْ دِيمَا مَنْ من باب دَارْهَا
مالك آش وقع ليك ؟ عينيك ديما فالارض..
عْلاَهْ ما شفتي ديك الحجرة ؟
مالك تتجري أو تَلْهَتْ أو زَرْبان عْلا عمرك ؟؟
آسي آوْقَفْ أو جَاوْبني!
هو:آشْ بِيتِي تْْقُولي ليا؟؟
هي: مالك آش واقع ؟
هو: ظَنّيتْ رَانِي امْلَكْتها
هي: شكون هي ؟؟ شي مْفَلْسَا هادي لي دات ليك لعقل !؟
هو: الدنيا يا الدنيا ظنيت راني مْلَكْتها بفلوسي أوبَامْلاكي أو بقيت ظلم هدا ، ادِّي دْيَالْ هدا ، اهْرَفْ علا هدا ، أو نسيت لي خلقني ، دَاكْ شِي لي نْهَبْت ما شَبّعْنِيشْ، أو بقيت خايف عليه ، أو بغيت نزيد أو نزيد أو ما كَيْهَمْنِيشْ مْنِينْ أو كِيفَاشْ ؟
هي: إوَا.. آشْ وْقَعْ مَنْ بَعْد بالسلامة؟
هو: ما يدوم حال فهاد الدنيا كل شي فاني الدايم الله سبحانه..
كل شي مْشَا ما بْقَى عندي والو ، أو هاني كنْدُورْ فالزْنَاقِي حفيان كنسعى طرف تالخبز باش نسكت الجوع أو قطرة ديال الْمَا بَاشْ نْبَلَّلْ رِيقِي
هي: راني يا ولدي بحال إلا شيفاك فالتليفزيون ..
لا حولة و لا قوة إلا بالله كلامك يا مسكين فكرني فصدام حسين يَاكْ شَفْتي كيف كان ، أو كيف تَلاتْ بِهْ لِيام ، أو هداك لاخُرْ لي كان فْإيران قبل الخمايني حتى هو.. أسمو ؟
هو: شاه إيران ؟؟
هي: ما نعرف لْبَابَاهْ ..
أو دبا عرفتي راك كنتي ظالم راسك قبل ما تظلم غيرك أو عَمّرْتِي راسك بَوْسَخْ الدنيا ، إوَا كَاعْ لي دَازتْ علا الراس تنفع ، أو دبا واش عرفتي بْحَق الدنيا ، أو بْحَقْ القَهْرَة ، راه قال ليك ما حَاسْ بَالْمَزْوَدْ غير لي مَضْرُوب بِهْ.
زِيدْ زِيدْ نْدَاوِي ليك بَعْدَا هَدَاكْ الصْبَعْ الموضوعالأصلي :
ما يدوم حال المصدر : مــ ـعهد ســـ ــماء المغرب